அஞ்சனை மைந்தனும் ஆத்மராமனும்

அஞ்சனை மைந்தனும் ஆத்மராமனும்
வடிவத்தில் வேறுபடினும்
இருவரும் ஒன்றே

அண்டியவர்களைக் காக்கும் துணிவும்
அடி பணிந்தவர்களிடம் காட்டும்   பரிவும்
ஒருங்கே அமைந்த தெய்வங்கள் இருவரும்

அக்னி தீண்ட இயலா அன்னை சீதையின்
கற்பு கனலின் சக்தியை ராவணன் தன் வாலில்
மூட்டிய தீயை கொண்டு தான் அழிபடாது
இலங்கையை மட்டும் அழித்து உலகுக்கு
உணர்த்தினான் அஞ்சனை மைந்தன்.

தீயில் புகுந்தாலும் தீது நேராது வெளிவருவாள்
என சீதையின் கற்பின்  மாண்பினை  உலகிற்கு
காட்டினான் ஆத்மராமன்.

தன்னை சரணடைந்தவனைக் காக்க தன்
இதய தெய்வத்தையே எதிர்க்க புகுந்தான்
அஞ்சனை மைந்தன்

தன் அன்பு பக்தனுக்காக தன் வில்லிலிருந்து
விட்ட அம்பினை அன்பு மாலையாக
அணிவித்து மகிழ்ந்தவன் ஆத்மராமன்.

அழகின் வடிவம் ,ஆற்றலின் உருவம்,
பணிவின் சிகரம் இருவரும்
பக்தியுடன் பணிந்தோருக்கு பக்கபலமாய்
இருப்பார்கள் எப்போதும்