முருகா வந்தருள் தருவாய் உன்னருள்

முருகா வந்தருள் 
தருவாய் உன்னருள் 

இவ்வுலகிற்கு எங்கிருந்து
வந்தேன் நானறியேன்

மீண்டும் எங்கு செல்வேன்
என்றும் நானறியேன்

உறக்கத்திலும் மயக்கத்திலும்
எங்கு சென்றேன்
என்பதையும் நானறியேன்

அன்றாடம் நடக்கும்
இச்செயல்கள்
ஆச்சரியத்தை
அளிக்குதையா முருகையா

அழியும் உடலின் மீது
அடக்கவொண்ணா
மோகம் ஒவ்வொரு கணமும்
அதனால் அடைந்தேன்
பல பல சோகம்

இன்பந்தனை தேடுகின்றேன்
இவ்வுடல்மூலம்
துன்பந்தனைதான்
பரிசாகப் பெற்றேன்

எத்தனைமுறை அடைந்துவிட்டேன்
கணக்கற்ற துன்பங்களை
இந்த உடல்மூலம்

இருந்தாலும் அதிலிருந்து
விடுபட மறுக்குதையா
கந்தையா இந்த பாழும் மனம்

என்ன செய்வேன்
 யாது செய்வேன்
இந்த நச்சு மனதின்
ஆசைகளிலிருந்து விடுபட்டு
மாறாத நிலைத்த இன்பம் பெற

சித்தரும், முத்தரும்
போற்றிப் பணியும் முருகா

பித்தராய் உன் புகழ் பாடி
திரியும் அடியவர்கள்
வணங்கும் வேலவா

என் போல் பக்தர்களுக்கும்
 எளிதில் இறங்கும்
தணிகைநாதா

என்னை விடுவிப்பாய்
உலக மாயையிலிருந்து
இவன் வேண்டுதலை ஏற்று.