முதல் மரியாதையும் இறுதி மரியாதையும்

முதல் மரியாதையும் இறுதி மரியாதையும் 

நான் மண்ணாகவே இருந்திருப்பேன்
வடிவமில்லாமலே

உருவமில்லாது ஒளியாய் இருக்கும்
எனக்கு வடிவம் கொடுத்த என்  படைப்புகளே

நகைகள் பூட்டி மாலைகள் சாற்றி
அழகு பார்த்தீர் .
அறுசுவை உணவுகள் படைத்தீர்.
ஆளுக்கொரு கோரிக்கைகளை
அளவில்லாது வைத்தீர்

உற்சாகமாய் ஏற்றுக்கொண்டேன்
உங்கள் வழிபாடுகளை. உளமார

எல்லாம் வெறும் நடிப்பென்று
இப்போதுதான் புரிகிறது.

வேலை முடிந்ததும்
உங்கள் வேலையைக்
காட்டிவிட்டீர்களே




தொப்பையோடு கூடிய என்னை
குப்பைகளுடன் வீசிஎறிந்துவிட்டு
திரும்பிப் பாராமல்
சென்றுவிட்ட உங்களை நான்
என்னவென்று நினைப்பது ?

மீண்டும் அடுத்த வருடம்
வருவீர்கள் .உங்கள் பாசத்தை
காட்டுவீர்கள். அதை உண்மை என்று
நம்பி நானும் மோசம் போவேன்.
நீங்கள் காட்டுவது நடிப்பு என்றறியாது.

உயிரற்ற பிணத்தை அலங்கரித்து
தூக்கி சென்று மண்ணில் அடக்கம் செய்கின்றீர்
மிகுந்த அடக்கத்துடன். அல்லது
சிதையில் இடுகின்றீர் வருத்தத்துடன்.

உங்களை படைத்து காக்கும்
எனக்கு மட்டும் ஏன்  இந்த கொடுமை?
சிந்திப்பீர் என் பக்தர்களே.

எல்லாம்  கலிகாலம்
உங்களுக்கும் மட்டுமல்ல
என் போன்ற தெய்வங்களுக்கும்
இந்த நிலைமைதான் போலும்.